Texnologiya kompaniyalari aksiyalarining jahon bo‘ylab sotilishi Osiyo birjalarini larzaga soldi. Janubiy Koreyaning asosiy fond indeksi KOSPI 15-oktabr kuni 7,6 foizga tushib, 5554 punktgacha pasaydi.
Bu indeks uchun iyul oyidan beri eng yomon kun bo‘ldi. Iyun oyida sun’iy intellekt atrofidagi ajiotaj tufayli KOSPI tarixda ilk bor 9000 punktdan oshgan edi. O‘shandan beri indeks 39 foizga arzonlashdi, faqat so‘nggi bir oyda 16 foizdan ko‘proq yo‘qotdi.
Indeksning asosiy qismini tashkil qiluvchi ikki chip ishlab chiqaruvchi eng ko‘p zarar ko‘rdi: Samsung Electronics aksiyalari 9,5 foizga, SK Hynix aksiyalari esa 11 foizdan ko‘proq tushdi. Yaponiyaning Nikkei 225 indeksi ham 4,9 foizga pasaydi, SoftBank Group aksiyalari 9 foizdan ziyod arzonladi.
Tushishga AQShdan kelgan inflyatsiya ma’lumotlari turtki bo‘ldi. AQSh Mehnat statistikasi byurosi ma’lumotiga ko‘ra, sentabrda iste’mol narxlari yillik hisobda 3,7 foizga o‘sdi. Avgustda bu ko‘rsatkich 3,4 foiz edi, iqtisodchilar esa pastroq raqamni kutgan. Shundan so‘ng Nasdaq indeksi 1,9 foizga, S&P 500 esa 1,1 foizga tushdi.
Investorlarni sun’iy intellektga sarflanayotgan ulkan mablag‘lar qachon foyda keltirishi tobora ko‘proq tashvishga solmoqda. Kompaniyalar ma’lumotlar markazlari va chiplar uchun katta qarzlar olmoqda. Morningstar tahlilchilari fikricha, texnologiya ulushi yuqori bo‘lgan Koreya va Tayvan bozorlari sun’iy intellekt xarajatlari sekinlashuviga eng sezgir hisoblanadi.
