FVV Akademiyasi huzurida qutqaruvchilarni tayyorlash texnikumi tashkil etiladi

10.11.2026, 20:00 · 44 marta o‘qilgan
Qutqaruvchilar mashg'uloti
Foto: U.S. Army video by Eugen Warkentin / Wikimedia Commons, Public domain

O‘zbekistonda favqulodda vaziyatlardan muhofaza qilish sohasida malakali qutqaruvchilarni tayyorlash tizimini takomillashtirish maqsadida yangi texnikum tashkil etilmoqda. Bu Vazirlar Mahkamasining 2026-yil 6-noyabrdagi 611-son qarorida belgilandi.

Hujjatga ko‘ra, Qutqaruvchilarni tayyorlash texnikumi Favqulodda vaziyatlar vazirligi Akademiyasining yagona ta’lim kampusida alohida yuridik shaxs maqomida faoliyat yuritadi. Texnikum faoliyati 2027/2028-o‘quv yilidan boshlab yo‘lga qo‘yiladi.

Muassasaga umumiy o‘rta ta’lim maktablari bitiruvchilari davlat granti va to‘lov-kontrakt asosida o‘qishga qabul qilinadi. O‘quv jarayoni boshlang‘ich, o‘rta va o‘rta maxsus kasbiy ta’lim dasturlari bo‘yicha tashkil etiladi. Bundan tashqari, ichki va tashqi mehnat bozori ehtiyojlari hamda ish beruvchilarning takliflari asosida qisqa muddatli kasbga o‘qitish kurslari tashkil etiladi.

Yirik iqtisodiyot obyektlari va xavfli ishlab chiqarish korxonalarida ishlayotgan qutqaruvchilar ushbu tashkilotlar buyurtmasiga asosan to‘lov-kontrakt shaklida imtiyozli o‘qishga qabul qilinadi.

Qarorga muvofiq, 2029-yildan boshlab texnikumning kasbiy ta’lim yo‘nalishlarini tamomlagan bitiruvchilar orasidan favqulodda vaziyatlar organlari uchun kadrlar zaxirasi shakllantiriladi. Bu sohaga tayyor mutaxassislar oqimini ta’minlashga xizmat qiladi.

Telegram kanalimizga obuna bo‘lingEng so‘nggi yangiliklar @uzinterfax kanalida
Obuna bo‘lish

Fikr qoldiring

Your email address will not be published.

Yangiliklar Telegramda: @uzinterfax — obuna bo‘ling