Xitoyning Tsinxua universiteti hamda Avstriyaning Vena texnologiya universiteti (TU Wien) tadqiqotchilari bir-biridan mustaqil ravishda dunyodagi birinchi yadro soatlarini yaratdi. Natijalar Nature jurnalidagi ikkita maqolada e’lon qilindi, deb xabar berdi Euronews.
Hozirgi eng aniq soatlar elektronlarning energiya sathlari orasidagi o‘tishni kuzatsa, yangi soatlar atom yadrosi ichidagi o‘tishdan foydalanadi. Buning uchun toriy-229 izotopi ishlatiladi — bu ultrabinafsha nur bilan yadro holatini o‘zgartirish mumkin bo‘lgan yagona ma’lum yadrodir. Olimlar 148,4 nanometr to‘lqin uzunligidagi lazerni toriy-229 joylashtirilgan kichik kalsiy ftorid kristallariga yo‘naltirdi. Lazer yadroga mahkam «ulanib» turdi va sinov davomida taxminan kvadrillionda bir aniqlikka erishdi.
Aniq vaqt sun’iy yo‘ldosh navigatsiyasi va telekommunikatsiya uchun muhim, shu bois yadro soatlari bu tizimlarni yanada aniqroq qilishi mumkin. Maqolalar ularni fundamental fizika uchun muhim deb hisoblaydi, ammo aniq qo‘llanish yo‘nalishlarini ko‘rsatmaydi.
