DXX reydlari: aholiga ajratilgan 3 mingdan ortiq gaz ballonini qimmatga sotishga urinish fosh etildi

27.10.2026, 17:30 · 64 marta o‘qilgan
Suyultirilgan gaz ballonlari
Foto: Mykim5902 / Wikimedia Commons, CC BY-SA 4.0

O‘zbekistonda 19–21-oktabr kunlari o‘tkazilgan reydlarda suyultirilgan gaz ballonlarining noqonuniy aylanmasi bilan bog‘liq 120 dan ortiq holat aniqlandi. Gazlashtirilmagan hududlar aholisi uchun ajratilgan 13,6 tonna suyultirilgan gaz solingan 3000 dan ortiq ballon musodara qilindi, deb xabar berdi DXX matbuot xizmati.

Reydlar Davlat xavfsizlik xizmati, Ichki ishlar vazirligi, Bosh prokuratura, Favqulodda vaziyatlar vazirligi va O‘zenergoinspeksiya tomonidan hamkorlikda o‘tkazilmoqda. Ma’lum qilinishicha, 39 ta holatda gaz xizmati xodimlarining o‘zi aloqador ekani aniqlangan.

Jizzax viloyatida 9 ta holatda 239 ta ballon noqonuniy saqlangani aniqlandi. Ulardan birida tuman gaz ta’minoti bo‘limida yuqori lavozimda ishlagan shaxsning qarindoshi uyida 152 ta ballon saqlaganlikda gumonlanmoqda. Sirdaryo viloyatida Xovos tumani gaz ta’minoti bo‘limi mansabdorining uyidan 30 ta ballon olib qo‘yildi.

Samarqand viloyatida Urgut tumanidagi ballon to‘ldirish shoxobchasi qorovuli 3 ta to‘ldirilgan ballonni 2,5 million so‘mga sotayotganda ushlandi. Pastdarg‘om tumanida esa bir fuqaro uyidan 22 ta ballon topildi: u ularni gaz ta’minoti bo‘limi haydovchisidan 70 ming so‘mdan sotib olib, 100 ming so‘mdan qayta sotgan. Farg‘ona viloyatining Qo‘shtepa tumanida gaz bo‘limi muhandisi va chilangar sotish uchun uylarida 8 ta ballon saqlagan.

Surxondaryo viloyatida reydlar davomida 65 ta ballon olib qo‘yildi. Bandixon tumanida 39 yoshli erkak qayta sotish maqsadida tuman gaz ta’minoti bo‘limi haydovchisidan 32 ta ballonni 70 ming so‘mdan sotib olgan. Navoiy viloyatining Xatirchi tumanida gaz bo‘limi haydovchisining uyidan 26 ta ballon topildi. Shunga o‘xshash qoidabuzarliklar Qoraqalpog‘iston, Xorazm, Namangan va boshqa hududlarda ham aniqlangan.

DXX gaz ballonlarining noqonuniy aylanmasiga duch kelgan fuqarolarni 1520 raqamiga murojaat qilishga chaqirdi. Murojaat qiluvchilarning maxfiyligi kafolatlanadi. Eslatib o‘tamiz, kuz-qish mavsumi yaqinlashgani sari gazlashtirilmagan hududlarda suyultirilgan gazga talab ortadi.

Telegram kanalimizga obuna bo‘lingEng so‘nggi yangiliklar @uzinterfax kanalida
Obuna bo‘lish

Fikr qoldiring

Your email address will not be published.

Yangiliklar Telegramda: @uzinterfax — obuna bo‘ling