O‘zbekistonliklar uchun Misrga kirishning yangi qoidalari 2027-yil martgacha kechiktirildi

27.10.2026, 12:00 · 78 marta o‘qilgan

O‘zbekiston fuqarolarining Misrga, xususan, Sinay yarim oroli va Sharm ash-Shayxga kirishiga oid qat’iyroq qoidalarni joriy etish muddati 2027-yil 1-martga qadar kechiktirildi. Bu haqda O‘zbekiston Tashqi ishlar vazirligi matbuot xizmati xabar berdi.

Vazirlik ma’lumotiga ko‘ra, TIV va O‘zbekistonning Qohiradagi elchixonasi Misr tomoni bilan to‘g‘ridan-to‘g‘ri muzokaralar olib bordi. Natijada O‘zbekiston fuqarolarining ushbu hududga kirish tartibini qat’iylashtirish bo‘yicha avval qabul qilingan qarorni qayta ko‘rib chiqish yuzasidan kelishuvga erishildi.

Shu tariqa, yangi qoidalar kuchga kirgunga qadar o‘zbekistonlik sayyohlar Misrga, jumladan, Sharm ash-Shayx va Sinay yarim oroliga oldindan viza olmasdan, amaldagi tartib asosida sayohat qilishda davom etishi mumkin.

Eslatib o‘tamiz, avvalroq 1-noyabrdan boshlab O‘zbekiston fuqarolari Sinay yarim oroliga, jumladan, Sharm ash-Shayxga oldindan viza olmasdan kira olmasligi ma’lum qilingan edi. Yangi tartibga ko‘ra, safarlar faqat turoperator orqali tashkil etilishi, 40 yoshgacha bo‘lgan sayyohlar oila a’zolari hamrohligida sayohat qilishi va yetarli mablag‘ga ega ekanini tasdiqlashi talab etilishi aytilgan edi. Bu qoidalar ko‘plab sayyohlar va turoperatorlarda xavotir uyg‘otgan edi.

Ma’lumot uchun, Sharm ash-Shayx Sinay yarim orolining janubiy uchida, Qizil dengiz sohilida joylashgan kurort shahar bo‘lib, plyajlari va suv ostiga sho‘ng‘ish uchun qulay marjon riflari bilan mashhur. U so‘nggi yillarda o‘zbekistonlik sayyohlar orasida ham ommabop yo‘nalishlardan biriga aylangan. Shu bois yangi qoidalar haqidagi xabar kuz-qish mavsumida dam olishni rejalashtirgan ko‘plab fuqarolar uchun muhim bo‘lgan edi.

TIV xorijiy hamkorlar bilan fuqarolarning chet elga safar qilish imkoniyatlarini kengaytirish, vizasiz rejimlarni joriy etish va mavjud safar tartiblarini soddalashtirish bo‘yicha ishlarni davom ettirayotganini ma’lum qildi.

Vazirlik fuqarolarni xorijga safar chog‘ida mahalliy qonunchilik va qoidalarga qat’iy rioya qilish, viza va migratsiya talablarini bajarish, borilayotgan mamlakatning qadriyatlari va an’analarini hurmat qilishga chaqirdi. Idora ta’kidlashicha, har bir fuqaroning xorijda mas’uliyatli xulq-atvori O‘zbekistonning ijobiy imijini mustahkamlashga va xalqaro hamkorlikni rivojlantirishga xizmat qiladi.

Telegram kanalimizga obuna bo‘lingEng so‘nggi yangiliklar @uzinterfax kanalida
Obuna bo‘lish

Fikr qoldiring

Your email address will not be published.

Yangiliklar Telegramda: @uzinterfax — obuna bo‘ling