Davlat mablag‘larini o‘zlashtirishda gumonlangan sobiq mutasaddi Turkiyada ushlanib, O‘zbekistonga qaytarildi

22.11.2026, 19:00 · 20 marta o‘qilgan
Istanbul
Foto: A.Savin / Wikimedia Commons, FAL

O‘zbekiston va Turkiya huquqni muhofaza qiluvchi organlari o‘tkazgan tezkor tadbir davomida xalqaro qidiruvda bo‘lgan ayol qo‘lga olinib, O‘zbekistonga qaytarildi. Bu haqda O‘zbekistonning Istanbuldagi Bosh konsulxonasi xabar berdi.

Tergov ma’lumotlariga ko‘ra, Y.G. ismli ayol Xorazm viloyatidagi Bandlikka ko‘maklashish markazida mutasaddi lavozimda ishlagan davrida mansab vakolatlaridan foydalanib, davlat mablag‘larini o‘zlashtirish hamda rasmiy hujjatlarni soxtalashtirish bilan shug‘ullanganlikda ayblanmoqda.

U Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bo‘yicha qidiruvga berilgan edi.

Hozirda gumonlanuvchiga nisbatan tergov harakatlari davom etmoqda. O‘zlashtirilgan mablag‘larning aniq miqdori haqida ma’lumot berilmagan.

O‘zbekiston huquqni muhofaza qiluvchi organlari so‘nggi yillarda xorijga qochib ketgan gumonlanuvchilarni qidirish va qaytarish bo‘yicha xorijiy hamkasblar bilan hamkorlikni kuchaytirib kelmoqda. Bunday holatlarda odatda xalqaro qidiruv va huquqiy yordam to‘g‘risidagi kelishuvlardan foydalaniladi.

Telegram kanalimizga obuna bo‘lingEng so‘nggi yangiliklar @uzinterfax kanalida
Obuna bo‘lish

Fikr qoldiring

Your email address will not be published.

Yangiliklar Telegramda: @uzinterfax — obuna bo‘ling