Shavkat Mirziyoyev “Shovvozsoy” haqidagi gap-so‘zlarga munosabat bildirdi

Prezident Shavkat Mirziyoyev OAV vakillari bilan uchrashuv vaqtida “Shovvozsoy” dam olish zonasi haqida berilgan savolga javob berdi.

— Hurmatli Prezident, ijtimoiy tarmoqda ko‘p muhokamaga sabab bo‘lyapti, “Shovvozsoy” dam olish zonasi bilan bog‘liq axborot tarqaldi va ayni shu mavzuga sizning munosabatingizni bilishni istardik.

— Bu “O‘zbekiston temir yo‘llari”ning davlat korxonasi. Hech kim u yerda turib, yashamaydi yoki birovga o‘tkazilgani yo‘q. U davlatning joyi. Prezidentning nima aloqasi bor? Prezident ham agar qandaydir martabali, O‘zbekistonga foydasi tegadigan inson kelsa, boradi.

Aytmaysizlarmi, Prezident bilan biz piyoda yuramiz, sizlar ham kelib, bir marta piyoda yurib ko‘ringlar, keyin Prezident 5 yilda necha marta dam olibdi ekan, degan savolni nega bermaysizlar? — deydi Shavkat Mirziyoyev.

Avvalroq ijtimoiy tarmoqlarda “Shovvozsoy” dam olish maskani O‘zbekiston rahbariyati uchun qurilgani haqida taxminlar paydo bo‘lgan edi. Shundan so‘ng “O‘zbekiston temir yo‘llari” ushbu xabar asossiz va noxolis ekani haqida axborot berdi.

Kompaniyaning eslatishicha, Vazirlar Mahkamasining 2010-yildagi qaroriga asosan, Ugam-Chotqol milliy tabiat bog‘i tasarrufidagi “Shovvozsoy” o‘rmon xo‘jaligi yerlari “O‘zbekiston temir yo‘llari” kompaniyasiga temiryo‘lchilar va ularning oila a’zolari, kompaniyaning xorijiy hamkorlari, mamlakat aholisi va chet ellik sayyohlar uchun zamonaviy ekoturizm maskanini barpo etish hamda mavjud ekotizimni saqlab qolish maqsadida ajratilgan.

“Bu yerda 2011-yildan boshlab, ya’ni 10 yil davomida bosqichma-bosqich qurilish va bunyodkorlik ishlari olib borilgan. Barcha investitsiyalar temiryo‘l kompaniyasining budjetdan tashqari mablag‘lari, jumladan, daromadlari hisobidan amalga oshirilgan”, — deyiladi xabarda.

Kompaniya ma’lumotlariga ko‘ra, o‘tgan 10 yil davomida dam olish maskani qurilishiga sarflangan investitsiyalar hajmi 495 milliard so‘mni tashkil etgan.

“Ushbu dam olish va sog‘lomlashtirish maskanlarida ‘O‘zbekiston temir yo‘llari’ bilan shartnoma va yo‘llanmalar asosida, temiryo‘lchilar bilan bir qatorda, Prezident Administratsiyasi, Vazirlar Mahkamasi, turli vazirlik, idora va davlat tashkilotlari, mahalliy hokimliklar, shuningdek, respublika aholisi va chet ellik investorlar, hamkorlar va sayyohlarga ekoturizm va ekstremal turizm, salomatlikni mustahkamlash va qayta tiklash xizmatlarini ko‘rsatib kelmoqda”, — deya qayd etilgan bayonotda.

Fikr bildirish

Your email address will not be published.

Latest from Blog