Almazbek Atambayev 5−6-oktabr kunlari O‘zbekistonga tashrif buyuradi

O‘zbekiston Prezidenti Shavkat Mirziyoyevning taklifiga binoan Qirg‘iziston Prezidenti Almazbek Atamboyev 5−6-oktabr kunlari davlat tashrifi bilan O‘zbekistonda bo‘ladi. Bu haqda O‘zbekiston Prezidenti rasmiy saytida xabar qilindi.

O‘zbekiston Prezidentining 5−6-sentabr kunlari Qirg‘izistonga davlat tashrifi chog‘ida bo‘lib o‘tgan oliy darajadagi muloqotning davomi sifatida ikki davlat rahbarlari o‘zaro manfaatli hamkorlik aloqalarini yanada rivojlantirish istiqbollarini muhokama qiladilar, mintaqaviy va xalqaro siyosatning dolzarb masalalari bo‘yicha fikr almashadilar.

Davlat rahbarlari Toshkent shahrida bo‘lib o‘tadigan O‘zbekiston va Qirg‘iziston sanoat mahsulotlari ko‘rgazmasiga tashrif buyuradilar.

Muzokaralar yakunlari bo‘yicha Prezidentlar O‘zbekiston va Qirg‘iziston o‘rtasida Qo‘shma deklaratsiyani qabul qilishi kutilmoqda.

Tashrif doirasida turli sohalarda o‘zaro aloqalarni mustahkamlashga qaratilgan qator ikki tomonlama hujjatlar imzolanishi rejalashtirilgan.

Latest from Blog