Eron Tashqi ishlar vazirligi Suriyaga zarba berilgandan so‘ng, Isroilga qurol yetkazib berishga embargo joriy etishga va mamlakatni Birlashgan Millatlar Tashkilotidan chiqarishga chaqirmoqda.
Eron Tashqi ishlar vazirligi rasmiy vakili Ismoil Bagai Tehronning «bugun sionist rejim tomonidan Damashq hududidagi turar joy binosiga uyushtirilgan tajovuzkor hujumni qat’iyan qoralaganini» ma’lum qildi.
Bagai Isroilga qarshi chora ko‘rishga, jumladan, qurol embargosini joriy etishga va mamlakatni BMTdan chiqarishga chaqirdi.
Avvalroq, Suriya davlat axborot agentligi SANA Sayida Zaynab hududida «Isroil agressiyasi» haqida xabar bergan edi.
Isroil zarbasi natijasida yetti nafar tinch aholi vakili, jumladan ayollar va bolalar halok bo‘ldi, yana 20 kishi jarohat oldi, deb xabar berdi Suriya mudofaa vazirligi.
