Oʻzbekistondagi qishloq massivlarida yil oxiriga qadar 9179 uy qurilishi yakunlanadi, bugungi kunga qadar 10 ming 431 arzon uy-joy foydalanishga topshirildi. Bu haqda Oʻzbekiston prezidenti Shavkat Mirziyoyev huzurida arxitektura va qurilish sohasida amalga oshirilayotgan islohotlar natijalari yuzasidan Davlat arxitektura va qurilish qoʻmitasi rahbarlarining hisoboti davomida maʼlum qilindi.
Qishloq massivlarida yangilangan namunaviy loyihalar boʻyicha arzon uy-joylar qurish uchun 2 trillion 35 milliard soʻm mablagʻ ajratilgan.
Ushbu uy-joylar boʻyicha muhtoj oilalarga 1 trillion 620 milliard soʻmdan ortiq ipoteka kreditlari 15 yil muddatga ajratilmoqda.
Dasturni amalga oshirish natijasida 2017-yil 19 mingdan ortiq qishloq oilasi shahardagidan qolishmaydigan shinam va zamonaviy uy-joyga ega boʻladi. 2018-yil ham qishloq joylarda yangilangan namunaviy loyihalar asosida qariyb 20 ming arzon uy barpo etiladi.
Joriy yilda shaharlarda namunaviy loyihalar asosida 7 ming 919 xonadonli 191 koʻp qavatli uy qurilmoqda. Xususan, Toshkent shahrining Sergeli tumanida 102 koʻp qavatli arzon va qulay uy-joy qurilmoqda. Bugungi kunda 70 uyning qurilish ishlari yakunlandi va foydalanishga topshirildi. Jumladan, Toshkent viloyatining Angren shahrida 9 qavatli 162 xonadonli 4 ta hamda poytaxtning Sergeli tumanida 2 576 kvartiraga moʻljallangan 66 ta koʻp qavatli uy qurib bitkazildi va xonadon egalariga kalitlar topshirildi.
Dasturni amalga oshirish natijasida 2017-yil 8 mingdan ortiq shahar oilalari zamonaviy, shinam va qulay xonadonlarga ega boʻladi.
Kelgusi yillarda quriladigan uylar soni 1,5-2 barobar koʻpaytirilgan. Xususan, 2018-yil jami 15 ming 172 xonadonga ega boʻlgan 365 ta koʻp qavatli uy qurish koʻzda tutilgan.
