30-iyun “Yoshlar kuni” munosabati bilan Respublikamizning barcha hududlarida “Yangi Oʻzbekiston yoshlari birlashaylik!” shiori ostida “Yoshlar oyligi” boʻlib oʻtayotganidan xabaringiz bor. Ayni damda bir guruh maʼrifat targʻibotchilari Xorazm viloyati boʻylab maʼrifiy tadbirlar oʻtkazmoqda.
Kuni kecha Xiva shahridagi Ichan qalʼa muzeyida “Mening farzandim — Oʻzbekiston faxri” loyihasining taqdirlash marosimi boʻlib oʻtdi.
Loyiha doirasida viloyatdagi ilm-fan, madaniyat, sanʼat, sport, axborot texnologiyalari va kitob oʻqishga boʻlgan qiziqishini har tomonlama qoʻllab-quvvatlash maqsadida 10 nafar yoshlar va ularning ota-onalari taqdirlandi.
Taqdirlanganlar roʻyxati eʼtiborimizni tortdi:
– Boks boʻyicha koʻp karra Oʻzbekiston chempioni Jahon chempioni Dilshodbek Roʻzmetov va uning otasi;
– Belbogʻli kurash boʻyicha jahon chempionati hamda 2022-yilgi “Zulfiya” mukofoti sovrindori Ullijon Davletova va uning onasi;
– WMI xalqaro olimpiadasining saralash bosqichida oltin medal sovrindori Bekzod Maqsudov va uning ota-onasi;
– 2022-2023-oʻquv yili uchun Respublika oliy taʼlim muassasalari bakalavriat bosqichi talabalari uchun taʼsis etilgan “Beruniy” nomidagi Davlat stipendiyasi sohibasi Muyassarxon Allaberganova hamda uning onasi;
– Sportning ARMWRESTLING turi boʻyicha Osiyo chempioni Odamboy Shavkatov hamda uning akasi;
– Basketbol boʻyicha V.I. Duyunovaning xalqaro turniri faxrli 1-oʻrin sohibasi Sevinch Hayitboyeva hamda uning onasi;
– Sportning Dzyudo turi boʻyicha jahon chempionatida 3-oʻrinni qoʻlga kiritgan Murodjon Yoʻldoshev va uning buvisi;
– “Ilhom – 2023” tanlovida 1-oʻrin sohibi sifatida Prezident sovgʻasi – “SPARK” avtomashinasi bilan taqdirlangan Akbar Otaboyev hamda uning otasi;
– Sportning dzyudo turi boʻyicha Parij (Fransiya) shahrida oʻtkazilgan “Katta Dubulgʻa” turnirida 3-oʻrin sohibi Alisher Yusupov hamda uning onasi;
– 2022-yil Xindistonning Chennay shahrida oʻtkazilgan 44-Butunjahon shaxmat olimpiadasi chempioni Nodirbek Yoqubbayev va uning onasi!
