Markaziy razvedka boshqarmasi direktori Bill Berns shu dam olish kunlari Qohiraga borib, Isroilning Mossad razvedka xizmati rahbari Devid Barnea hamda Qatar va Misrning yuqori martabali rasmiylari bilan Gʻazoda XAMAS tomonidan garovga olinganlarni ozod qilish masalasini muhokama qilishi kutilmoqda, deb xabar bermoqda Axios axborot manbalariga tayanib.
Portal Bernsning tashrifi AQSh prezidenti Jo Bayden Isroil Bosh vaziri Benyamin Netanyaxu bilan telefon orqali suhbatida isroillik muzokarachilarga garovga olinganlar boʻyicha kelishuv tuzish imkoniyatini berishni talab qilganidan keyin amalga oshishiga eʼtibor qaratmoqda.
Axiosning taʼkidlashicha, Baydenning bayonoti “prezident Netanyaxu garovga olish boʻyicha kelishuvga erishish uchun qoʻlidan kelgan barcha ishni qilmayotgani va yanada moslashuvchan boʻlishi kerakligiga ishonishidan dalolat beradi”.
Portal manbalaridan biri Baydenning pozitsiyasi oʻzgarishsiz qolayotganini aytdi: garovga olinganlarni ozod qilish boʻyicha kelishuv doirasida sulh bitimi tuzilishi kerak. Bu zudlik bilan sodir boʻlishi kerak, shuning uchun ham prezident telefon qoʻngʻirogʻi paytida “bu masala boʻyicha Netanyaxuga bosim oʻtkazdi”.
