2024-yilda naqd pul va terminal orqali amalga oshirilgan operatsiyalarni o‘z ichiga olgan jami pul tushumlari 840 trillion so‘mni tashkil etib, 2023-yilga nisbatan 26% ga oshdi. Bu haqda O‘zbekiston Markaziy banki ma’lum qildi.
Bank tizimi orqali naqd pul aylanishi hajmi 1 011 trillion so‘mni tashkil etdi. Shundan 501 trillion so‘m banklarning kassalariga tushgan, 510 trillion so‘m esa naqd pul sifatida berilgan. Bu ko‘rsatkich o‘tgan yilga nisbatan 22% ga oshgan.
2024-yilda bank kartalariga mablag‘ o‘tkazish hajmi 2023-yilga nisbatan 1,3 barobarga oshib, 1 034 trillion so‘mni tashkil etdi. Kartalardan yechilgan mablag‘ hajmi 226 trillion so‘mni tashkil etdi, bu esa o‘tgan yilga nisbatan 19,5% ga ko‘pdir.
Yil davomida Markaziy bank yangi namunadagi qo‘shimcha naqd pullarni muomalaga chiqardi, natijada banknotlar soni 152 million donaga ko‘paydi.
200 000 so‘mlik banknotlarning naqd pullar umumiy tarkibidagi ulushi 18,6% dan 23,4% ga oshdi, 20 000 so‘mlik banknotlarning ulushi esa 4,4% dan 6,7% ga ko‘tarildi.
Biroq, 100 000 so‘mlik banknotlarning ulushi 42,5% dan 40,9% ga, 50 000 so‘mlik banknotlarning ulushi esa 20,5% dan 16,6% ga kamaydi.
Eski banknotlarni almashtirishga alohida e’tibor qaratildi. Eski namunadagi 5 000 so‘mlik banknotlarning ulushi 2023-yildagi 67% dan 2024-yilda 25% ga, 10 000 so‘mlik banknotlar ulushi 64% dan 24% ga, 50 000 so‘mlik banknotlar ulushi 61% dan 25% ga, 100 000 so‘mlik banknotlar ulushi esa 39% dan 18% ga tushdi.